ᐹᒪᓚ ᔅᑏᕙᓐᓴᓐ ᐃᓕᓴᕐᓂᒥᒃ ᑯᐯᒻᒥ ᐳᓖᓰᑦ ᐃᓕᓴᕐᕕᖓᓂ ᐱᔭᕇᕐᑐᖅ ᐃᓕᑦᓱᓂᓗ ᑲᑎᕕᐅᑉ ᐳᓖᓯᖏᓐᓄᑦ

ᐊᓪᓕᕇᕐᑐᓂ, ᐊᒃᑑᐸ 16-ᒥ, ᐹᒪᓚ ᔅᑏᕙᓐᓴᓐ ᐅᖃᒻᒪᕆᑦᑎᑕᐅᓚᐅᕐᑐᖅ ᐳᓖᓯᖕᖑᓱᓂ ᐃᓕᑦᓱᓂ ᑲᑎᕕᐅᑉ ᐳᓖᓯᖏᓐᓄᑦ, ᐊᓂᒍᐃᒍᑎᑖᒥᓂᒃ ᐱᒌᕐᓱᓂ ᐃᓕᓴᕐᓂᒥᓂᒃ École nationale de police du Québec (ENPQ)-ᒥ ᓂᑯᐊᓕᑦᒥ ᐊᒃᑑᐸ 6-ᒍᑎᓪᓗᒍ.

​ᐃᓚᐅᓯᒪᑦᓱᓂ ᑲᑎᕕᐅᑉ ᐳᓖᓯᖏᑦᑕ ᐳᓖᓯᐊᕈᕐᓄᑦ ᐱᓇᓱᒐᖓᓄᑦ ᑰᑦᔪᐊᒥ 2009-ᒥᓂᑦ, ᐹᒪᓚ ᐱᓚᕿᓯᒪᔪᖅ ᐊᓂᒍᐃᑦᓱᓂ ᐳᓖᓰᑦ ᐱᓇᓱᐊᕈᑎᑦᓴᔭᖏᓐᓂᒃ ᐃᓕᓭᓂᖓᓂᒃ Ellis College ᐊᒻᒪᓗ ᐱᔭᕇᕐᓱᓂ ᐃᓕᓴᖃᑎᓕᒫᒥᓂᑦ ᐳᕐᑐᓂᕐᐹᓂᒃ ᑭᑎᑦᔪᑎᑖᖃᑦᑕᓱᓂ. ᐅᓪᓗᐃᑦ ᐱᖓᓱᑦ ᐊᓂᒍᕐᑎᓗᒋᑦ, ᐱᒋᐊᓚᐅᔫᖅ ᑯᐯᑉ ᐳᓖᓯᓂᒃ ᐃᓕᓐᓂᐊᑎᑦᓯᕕᖓᓂᒃ, ᐱᓇᓱᐊᕈᓯᑐᕐᓱᓂ 15-ᓂᒃ ᒣ 29-ᒍᑎᓪᓗᒍ ᐱᒋᐊᓚᐅᔫᖅ. ENPQ -ᒥ ᐃᓕᓴᕐᓂᒥᓂᒃ ᐊᓂᒍᐃᑎᓪᓗᒍ, ᑲᑎᕕᐅᑉ ᐳᓖᓯᖏᑦᑕ ᐊᖓᔪᕐᖄᖓ ᒥᓯᐊᓪ ᒪᕐᑌᓐ ᐊᒻᒪᓗ ᑭᒡᒐᑐᕐᑎᖓ ᐱᓇᓱᑦᑎᓕᕆᕕᖓᑕ ᑲᑎᕕᒃ ᓄᓇᓕᒫᑦ ᑲᕙᒪᖓᑕ (ᑫᐋᔩ) ᖁᕕᐊᓲᑕᐅᑎᓪᓗᒍ ᓄᑖᖅ ᐊᓂᒍᐃᔪᖅ ᐁᓯᒪᓚᐅᔫᑦ. ᐹᒪᓚ ᓯᕗᓕᕐᑎᒋᔭᐅᓚᐅᔪᒻᒥᔪᖅ ᐃᓕᓴᕐᓂᒥᒃ ᐊᓂᒍᐃᖃᑎᒥᓄᑦ, ᐳᓖᓯᓄᑦ ᓯᕗᓕᕐᑎᐅᓂᕐᒥᓄᑦ ᑎᓕᐅᕆᔨᐅᑦᓱᓂ. ᐅᓪᓗᐃᑦ ᑕᓪᓕᒪᐅᔪᖕᖏᒐᕐᑐᑦ ᐊᓂᒍᕐᑎᓗᒋᑦ, ᐅᖃᒻᒪᕆᑦᑎᑕᐅᓚᐅᔫᖅ ᐳᓖᓯᐅᓯᓂᕐᒥᓄᑦ ᑲᑎᕕᐅᑉ ᐳᓖᓯᖏᓐᓂ, ᖁᕕᐊᓲᑕᐅᑦᓱᓂ ᑫᐋᔩᒃᑯᑦ ᐳᕐᑐᓂᕐᓴᖏᓐᓄᑦ ᐊᒻᒪᓗ ᐃᓚᒥᓄᑦ. "ᐊᑦᔨᒋᔭᐅᖕᖏᑐᖅ ᐊᓂᒍᐃᑦᓯᐊᓂᖓ, ᐃᓄᓐᓂᒃ ᓄᓇᕕᒻᒥᐅᓂᒃ ᑌᒪᖕᖓᓂᑦ ᐱᓇᓱᑦᑎᑖᕋᓱᐊᕐᓯᒪᔪᒍ ᑭᓯᐊᓂᓗ ᐱᔭᕐᓃᑐᒻᒪᕆᐅᕙᑦᓱᓂ", ᑐᑭᓯᑎᑦᓯᓚᐅᔫᖅ ᐊᖓᔪᕐᖄᖅ ᒪᕐᑌᓐ ᐊᓂᒍᐃᓂᖓ ᖁᕕᐊᓲᑕᐅᓂᖃᕐᑎᓗᒍ. "ᐹᒪᓚ ᐊᕐᓱᕈᓐᓇᑐᒃᑰᖃᑦᑕᓚᐅᔫᖅ. ᐃᓅᓯᕐᒥᓂ ᐱᔪᒪᔭᖃᕐᓯᒪᔪᖅ, ᑭᒡᒐᑐᕐᓂᒥᒃ ᐊᒻᒪᓗ ᐅᖑᒪᑦᓯᓂᕐᒥᒃ ᑕᕐᕋᒥ ᓄᓇᓕᓐᓂᒃ ᐊᒻᒪᓗ ᐅᐱᒪᒋᒻᒪᕆᓕᕐᑕᕋ ᓄᓇᕕᒻᒥᐅᓂᒃ ᐱᔪᑦᓴᐅᔮᕐᑎᓯᓚᕿᓂᐊᓕᕐᒪᑦ. ᐊᓯᒥᓄᑦ ᒪᓕᑦᑕᐅᖁᔭᕋ ᐃᓚᒋᓕᐅᑎᓂᕐᓴᐅᖃᑦᑕᓂᐊᓕᕐᑎᓗᒋᑦ ᑲᑎᕕᐅᑉ ᐳᓖᓯᖏᓐᓄᑦ." ᑭᓯᐊᓂ ᖁᕕᐊᓱᓐᓂᖅ ᐊᓐᓂᑭᑦᑑᓚᖓᓕᕐᑐᖅ: "ᑕᒐ, 4-ᖕᖑᐸᑦ ᕿᖃᕈᓐᓀᓂᐊᓕᕐᑐᑎᑦ, ᑌᒪ ᐱᓇᓱᐊᓯᓂᐊᓕᕋᕕᑦ ᐅᓐᓄᐸᑦ, ᓚᖓᓕᕐᖀᑦ?" ᓚᓐᓂᓚᐅᔫᖅ ᐊᖓᔪᕐᖄᖓ ᐳᓖᓰᑦ ᒪᕐᑌᓐ.