ᖃᒻᒥᐅᓂᕐᐹᖅ ᐊᖏᔪᒥᒃ ᑎᒍᔨᓐᓂᒍᑕᐅᓯᒪᔪᑦ ᓄᓇᕕᒻᒥ

ᓄᕕᒻᐱᕆ 29 2023-ᒥ, NPS-ᑯᑦ ᐳᓖᓯᖏᑦ ᐃᓄᒃᔪᐊᒥ ᐱᓇᓱᑦᑐᑦ ᑲᔪᓯᑎᑦᓯᓚᐅᔪᔪᑦ ᕿᓂᕈᓐᓇᐅᑎᒥᒃ ᐱᑦᔪᑎᖃᕐᑎᓗᒍ ᐱᖁᔭᑎᒎᖕᖏᑐᖅ ᐃᒥᐊᓗᐃᑦ ᓂᐅᕐᕈᑕᐅᓂᖓᓂᒃ ᐃᓪᓗᒋᔭᐅᔪᒥ. ᑕᒡᒐᓂ ᐃᓪᓗᒥ, ᐳᓖᓰᑦ ᑎᒍᓯᓚᐅᔪᔪᑦ 60-ᓂᒃ ᐳᓪᓚᐅᔮᐱᓐᓂᒃ ᐊᑐᓂ 750 ml-ᓂᒃ ᐃᓗᓕᓕᓐᓂᒃ ᓯᒥᐊᓇᕝ ᕙᒃᑲ ᐃᒥᐊᓗᖓᓂᒃ, ᐊᒻᒪᓗ ᑮᓇᐅᔭᓂᒃ $7086-ᓂᒃ.

ᓯᕗᓂᐊᒍᑦ, ᓄᓇᕕᒻᒥ ᐃᑲᔪᕐᑎᒌᑦ ᑭᓪᓕᓯᓂᐊᕐᑎᐅᖃᑎᒌᑦ ᑲᔪᓯᑎᑦᓯᓚᐅᔪᒻᒥᔪᑦ ᒪᕐᕉᓂᒃ ᐊᒥᒐᖕᖏᑐᕋᑕᕐᓂᒃ ᑎᒍᔨᓐᓂᒍᑏᓐᓂᒃ ᑰᑦᔪᐊᒥ. ᓄᕕᒻᐱᕆ 23-ᒥ, ᑭᓪᓕᓯᓂᐊᕐᑏᑦ ᕿᓂᕈᓐᓇᐅᑎᒥᒃ ᑲᔪᓯᑎᑦᓯᓚᐅᔪᔪᑦ ᐱᑦᔪᑎᖃᕐᑎᓗᒍ ᑰᑫᓐ-ᑯᕌᒃ ᐋᖓᔮᓐᓇᑐᐃᑦ ᓂᐅᕐᕈᑕᐅᓂᖓᓂᒃ ᐃᓪᓗᒋᔭᐅᔪᒥ. ᑕᒡᒐᓂ ᐋᖓᔮᓐᓇᑐᓂᒃ ᓀᐱᑦᓯᒍᑎᒥᓂ, ᐳᓖᓰᑦ ᒪᕐᕉᓂᒃ ᐸᓯᔭᑦᓵᓂᒃ ᐸᕐᓇᓀᕐᓯᓚᐅᔪᔪᑦ. ᑌᑲᓂ ᐃᓪᓗᒥ, ᑭᓪᓕᓯᓂᐊᕐᑏᑦ ᑎᒍᓯᓚᐅᔪᔪᑦ 35 ᑯᕌᒻᓂᒃ ᑯᑫᓐᓂᒃ, 2-ᓂᒃ ᓇᑦᓴᑲᑦᑕᒐᐅᑦᓱᑎᒃ ᐅᖃᓕᒪᐅᑏᓐᓂᒃ, ᐊᑕᐅᓯᕐᒥᒃ ᖃᕆᑕᐅᔭᒥᒃ, ᐊᒻᒪᓗ ᑮᓇᐅᔭᓂᒃ ᑭᓯᒍᑎᒥᒃ. ᐸᓯᔭᑦᓵᒃ ᑕᒪᕐᒥᒃ ᐊᓂᑎᑕᐅᓚᐅᔪᔫᒃ ᐃᕐᖃᑐᐃᕕᒻᒧᑦ ᓄᐃᒋᐊᖃᓛᕐᓂᖓᓂᒃ ᖃᐅᔨᑎᑕᐅᒍᑎᖃᕐᓱᑎᒃ.

ᓄᕕᒻᐱᕆ 20-ᒥ, ᑖᒃᑯᐊᓭᓐᓀᑦ ᐃᑲᔪᕐᑎᒌᑦ ᑭᓪᓕᓯᓂᐊᕐᑏᑦ ᑌᒫᑦᓭᓇᖅ ᐱᓇᓱᐊᓚᐅᔪᒻᒥᔪᑦ ᐊᓯᐊᓂ ᐃᓪᓗᒋᔭᐅᔪᒥ ᑰᑦᔪᐊᒥ. ᑕᒡᒐᓂ ᐱᓇᓱᐊᕈᑎᖓᓂ, ᐃᓄᒃ ᐊᑕᐅᓯᖅ ᓵᑕᐅᒍᑎᖃᓚᐅᔪᔪᖅ ᓇᔪᕐᑎᖃᕐᓂᒥᒃ ᐊᒻᒪᓗ ᓂᐅᕐᕈᑎᖃᕐᓂᒥᒃ ᑯᕌᒃ-ᑰᑫᓐᒥᒃ, ᐊᒻᒪᓗ ᓯᖁᒥᑦᓯᓯᒪᓂᕐᒥᒃ ᐊᓂᑎᑕᐅᑦᓱᓂ ᒪᓕᒐᕐᑖᕕᓂᕐᒥᓂᒃ. ᐃᓪᓗᖓᓂ, ᐳᓖᓯᒃᑯᑦ ᓀᐱᑦᓯᓚᐅᔪᔪᑦ ᑰᑫᓐᒥᒃ, ᑯᕌᒃᒥᒃ, ᐊᒻᒪᓗ ᐅᖃᓕᒪᐅᑎᐊᐱᓐᓂᒃ. ᑌᓐᓇ ᐃᓄᒃ ᑎᒍᔭᐅᒪᖏᓐᓇᓚᐅᔪᔪᖅ.