ᓄᓇᕕᒻᒥ ᓄᑖᑦ ᐃᑲᐅᕐᓃᑦ ᐃᓄᓕᒫᑦ ᐊᓃᕈᓐᓀᕕᒋᖃᑦᑕᕆᐊᖃᓕᕐᑕᖏᑦ

ᑰᑦᔪᐊᖅ, ᐁᐸᔭᓕ 15, 2020 – ᐅᓐᓄᐸᑦ ᐱᒋᐊᕐᓗᑎᒃ ᐃᓄᐃᑦ ᐊᓃᖃᑦᑕᕆᐊᖃᓚᖓᒍᓐᓀᑐᑦ 10:00-ᖕᖑᒥ ᐅᓐᓄᑐᒃᑯᑦ ᐃᓘᓐᓀᓂ ᓄᓇᕕᒻᒥ ᓄᓇᓕᓐᓂ.

ᐊᓃᕐᑐᖃᕆᐊᖃᖕᖏᕕᐅᑉ ᐃᑲᐅᕐᓂᖓ, ᒪᓕᒐᑦᓴᖑᕐᑕᐅᓚᐅᔫᖅ ᒫᑦᓯ 29-ᒥ ᑭᓇᓕᒫᒃᑯᑦ ᐊᑦᑕᓀᑦᑐᒦᑦᑎᑕᐅᓂᖏᓐᓄᑦ ᑲᒪᔨᒻᒪᕆᐅᑉ ᐊᒻᒪᓗ ᓄᓇᕕᒻᒥ ᓄᓇᓕᓕᒫᓂ ᐅᐃᒪᓇᕐᑐᖃᓕᕐᐸᑦ ᐅᐸᓗᙰᕐᓯᒪᓂᕐᓄᑦ ᐊᔪᖀᒋᐊᕐᑏᑦ ᑲᑎᒪᔩᑦ ᐊᖓᔪᕐᖄᖓᑕ (N-REPAC) ᔮᓐ-ᐱᐊᕐ ᓚᕈᔅ ᐱᓂᕐᓗᑎᑦᓯᑌᓕᔨ ᐊᔪᐃᓐᓇᕈᑎᓕᒃ ᐃᕐᐸᑎᑦᓯᑌᓕᓂᕐᒥᒃ ᐳᕙᓕᕆᓐᓈᓘᑉ COVID-19 ᖁᐱᕐᕈᐊᕈᖏᓐᓂᒃ. ᐅᓪᓗᒥ 11-ᐅᓕᕐᑐᑦ ᓱᕐᖁᐃᑕᐅᓯᒪᔪᑦ ᖃᓂᒪᒍᑎᖃᕆᐊᖏᑦ ᑌᒣᑦᑐᒥᒃ ᓄᓇᕕᒻᒥ. ᐅᓐᓄᓴ ᐱᒋᐊᕐᕕᐅᑎᓪᓗᒍ ᓄᓇᕕᒻᒥᐅᓕᒫᖅ ᐊᓇᕐᕋᓯᒪᖃᑦᑕᕆᐊᖃᓚᖓᓕᕐᑐᑦ 10:00-ᒥ ᐅᓐᓄᑐᒃᑯᑦ 9:00-ᒥᐅᖕᖏᑐᖅ ᐅᓐᓄᑐᒃᑯᑦ ᐃᑎᕐᓯᒣᓐᓇᓚᖓᓕᕐᓗᑎᒃ 6:00-ᖑᖕᖏᓂᓕᒫᖓᓂ ᐅᓪᓛᑯᑦ. ᑌᒫᑦᓭᓇᖅ, ᑖᓐᓇ ᐊᓃᕆᐊᖃᖕᖏᑑᕕᒃ ᖃᖓ ᐃᓕᒪᓚᖓᒻᒪᖔᑦ ᖃᐅᔨᒪᓇᖕᖏᑐᖅ. ᑖᒃᑯᐊ ᐊᓯᑦᔨᔭᐅᓚᕿᔪᑦ ᐃᑲᐅᕐᓃᑦ ᐅᓪᓗᑐᓯᓯᒪᓕᕐᓂᒧᑦ. ᓄᓇᕕᒻᒥᐅᑦ ᒪᓕᑦᓯᐊᖃᑦᑕᑐᑦ ᐊᓃᕐᑐᖃᕆᐊᖃᖕᖏᕕᐅᑉ ᐃᑲᐅᕐᓂᖏᓐᓂᒃ ᐊᒻᒪᓗ ᑲᔪᓯᑎᑦᓯᓱᑎᒃ ᐱᒐᓱᐊᑦᓯᐊᕈᑎᒥᓂᒃ ᐃᑭᓪᓕᑎᕐᓯᒪᑎᑦᓯᒐᓱᐊᕐᓱᑎᒃ ᐃᕐᐸᐸᓪᓕᐊᓂᖓᓂᒃ ᖃᓂᒪᓐᓇᐅᑉ COVID-19. ᐃᓄᓕᒫᑦ ᐃᕐᙯᑎᑕᐅᕗᑦ ᐊᐅᓪᓚᑲᑦᑕᕆᐊᖃᖕᖏᓃᑦ ᓱᓕ ᐊᑐᕐᒪᑕ ᐊᒻᒪᓗ ᐃᓘᓐᓇᑎᒃ ᑭᓇᓕᒫᒃᑯᑦ ᖃᒧᑎᑲᓪᓚᑯᑦ ᓄᓇᓕᓕᐊᑲᑦᑕᕆᐊᖃᖕᖏᓂᖏᑦ ᑕᒪᓐᓇ ᓱᓕ ᐃᓂᕐᑎᕆᐅᑎᐅᓪᓚᕆᑦᓱᓂ ᐊᑐᕐᑎᑕᐅᔪᖅ. ᐃᓄᐃᑦ ᓄᓇᓕᒥᐅᓂᒃ ᐊᓯᒥᓂᒃ ᑲᑎᓯᖃᑦᑕᕆᐊᖃᖕᖏᑐᑦ ᐳᓖᓰᑦ ᒪᓕᑦᑕᐅᑎᑦᓯᓚᖓᔪᑦ ᐊᓃᕆᐊᖃᖕᖏᕕᐅᑉ ᐃᑲᐅᕐᓂᖏᑦᑕ ᒪᓕᑦᑕᐅᓂᖏᓐᓂᒃ ᓴᐳᑦᔭᐅᓗᑎᒃ ᓄᓇᓖᑦ ᑲᕙᒫᐱᖏᑦᑕ ᓯᕗᓕᕐᑎᖏᓐᓄᑦ. ᓯᕗᓕᕐᑏᑦ ᐊᒻᒪᓗ ᑲᑎᒪᔨᖏᑦ ᐱᒻᒪᕆᓐᓂᒃ ᑲᒪᒋᔭᖃᓚᖓᔪᑦ ᐃᓄᖁᑎᒥᑕ ᒪᓕᑦᓯᐊᕆᐊᖃᕐᓂᖏᓐᓂᒃ ᐊᓇᕐᕋᓯᒪᒋᐊᖃᕐᓇᐅᑉ ᐃᑲᐅᕐᓂᓕᐅᕐᑕᐅᓯᒪᒍᑎᖓᓂᒃ.  ᐱᕕᐅᔪᑦ:  ᓄᓇᕕᒻᒥ ᐅᐃᒪᓇᕐᑐᖃᓕᕐᐸᑦ ᐅᐸᓗᙰᕐᓯᒪᓂᕐᓄᑦ ᐊᔪᖀᒋᐊᕐᑏᑦ ᑲᑎᒪᔩᑦ                                         ​