ᐱᔭᑦᓴᓂᒃ ᑲᑐᑦᔨᔪᑦ ᐳᓖᓰᑦ ᑯᐯᒃᑯᑦ ᐳᓖᓯᖏᓐᓂ ᐊᒻᒪᓗ ᓄᓇᕕᒻᒥ ᐳᓖᓰᑦ ᐱᒍᑦᔨᔨᖏᓐᓂ ᑲᔪᓯᑎᑦᓯᕗᑦ ᑐᖓᓕᐊᓂᒃ ᐱᓇᓱᐊᕈᑎᒥᒃ ᐊᑭᓂᐊᕐᓂᒥᒍᑦ ᐃᒥᐊᓗᐃᑦ ᑕᒪᐅᓀᓐᓇᖅ ᓂᐅᕐᕈᑕᐅᓂᖓᓂᒃ
ᔫᓂᒥᓂᒃ 2024-ᒥ, ᑭᓪᓕᓯᓂᐊᕐᓂᒥᒃ ᐱᓇᓱᖃᑎᒌᑦ ᑯᐯᒃᑯᑦ ᐳᓖᓯᒃᑯᖏᓐᓂ ᑲᒪᒋᔭᑐᐊᓖᑦ ᐃᒥᐊᓗᐃᑦ ᑕᒪᐅᓀᓐᓇᖅ ᓂᐅᕐᕈᑕᐅᓂᖓᓂᒃ ᐊᒻᒪᓗ ᐱᖁᔦᑦ ᓯᖁᒥᑦᓱᒋᑦ ᑳᓇᐱᔅ ᓂᐅᕐᕈᑕᐅᓂᖏᓐᓂᒃ ᐱᓇᓱᖃᑎᖃᓚᐅᕐᑐᑦ ᓄᓇᕕᒻᒥ ᐃᑲᔪᕐᑎᒌᑦᓱᑎᒃ ᑭᓪᓕᓯᓂᐊᖃᑎᒌᓂᒃ ᓂᐅᕐᕈᑎᖃᕋᓕᑦᑐᑦ ᑲᒪᒍᑎᒋᑦᓱᒋᑦ. ᑖᒃᑯᐊ ᑭᓪᓕᓯᓂᐊᕐᑏᑦ ᑐᑭᓯᓂᐊᕈᑎᖃᖃᑦᑕᓚᐅᔪᔪᑦ ᐱᖁᔭᓂᒃ ᓯᖁᑦᑎᕆᔨᖕᖑᓯᒪᔪᓂᒃ ᐃᓄᓐᓂᒃ ᐱᑐᑦᓯᒪᐅᑎᑦᓱᑎᒃ ᐃᖏᕐᕋᑎᑦᓯᔪᓂᒃ ᓂᐅᕐᕈᓯᕐᓂᒥᒃ ᐊᒻᒪᓗ ᐊᐅᓪᓚᑎᑦᓯᑲᑦᑕᓂᕐᒥᒃ ᐃᒥᐊᓗᓐᓂᒃ ᐊᒻᒪᓗ ᓲᖑᔪᓂᒃ ᐋᖓᔮᓐᓇᑐᓂᒃ (ᑯᕌᒃ ᑰᑫᓐ). ᑖᒃᑯᐊ ᐱᑐᑦᓯᒪᐅᑎᔪᑦ ᐊᑐᖃᑦᑕᓚᐅᔪᔪᑦ ᓇᑦᓴᑲᑦᑕᑎᓂᒃ (ᐃᓄᓐᓂᒃ ᐊᑕᐅᓯᐅᓈᕐᑎᑐᓂᒃ) ᑎᕐᓕᑎᑦᓯᓱᑎᒃ ᑎᑭᐅᑦᔨᒍᑎᒋᑦᓱᒋᑦ ᐱᖁᔭᓄᑦ ᐱᔭᐅᖁᔭᐅᖕᖏᑐᓂᒃ ᐱᑑᒪᒐᕐᓂᒃ ᖃᖓᑦᑕᔫᒃᑯᑦ ᐱᐊ ᐃᐊᓕᐊᑦ ᑐᕉᑑ ᒥᕝᕕᖓᓂᒃ ᑐᕌᕐᑎᓗᒋᑦ ᓇᐅᑐᐃᓐᓇᓄᑦ ᓄᓇᕕᒻᒥ ᑕᕐᕋᒥᐅᑦ ᓄᓇᓕᖏᓐᓄᑦ.
ᑕᒪᑐᒥᖓ ᐱᓇᓱᓐᓂᐅᑉ ᑐᖓᓕᐊ ᑲᔪᓯᑎᑕᐅᑦᓱᓂ ᑕᒪᖏᓐᓄᑦ SQ-ᑯᓄᑦ ᐊᒻᒪᓗ ᓄᓇᕕᒻᒥ ᐃᑲᔪᕐᑎᒌᓄᑦ ᑭᓪᓕᓯᓂᐊᕐᑎᓄᑦ ᓯᑉᑎᒻᐱᕆ 26, 2024-ᒥ, ᑰᑦᔪᐊᑉ ᓄᓇᖓᓂ ᑲᔪᓯᑎᑦᓯᒍᑕᐅᓚᐅᔪᔪᖅ 3-ᓂᒃ ᕿᓂᔭᕐᓂᓂᒃ ᐊᓂᕐᕋᕆᔭᐅᔪᓂ ᐊᒻᒪᓗ ᐊᑕᐅᓯᕐᒥ ᓄᓇᒃᑰᔫᒥ. ᑖᒃᑯᐊ ᕿᓂᔭᕐᓃᑦ ᑐᕌᕈᑕᐅᓚᐅᔪᔪᑦ ᐸᕐᓇᓀᕐᓯᓂᕐᒧᑦ 3-ᓂᒃ ᐃᓄᓐᓂᒃ: 2 ᐊᕐᓈᒃ 31-ᓂᒃ 35-ᓂᓪᓗ ᐅᑭᐅᓖᒃ, ᐊᒻᒪᓗ 41-ᓂᒃ ᐅᑭᐅᓕᒃ ᐊᖑᑎ. ᑖᒃᑯᐊ ᐸᓯᔭᐅᔪᑦ ᑭᓪᓕᓯᓂᐊᕐᑕᐅᓚᐅᔪᔪᑦ ᓴᒃᑯᑕᐅᒻᒥᓱᑎᓪᓗ ᓄᐃᒋᐊᖃᓛᕐᓂᖓᓂᒃ ᖃᐅᔨᑎᑦᓯᒍᑎᒥᒃ ᐁᑦᑐᑕᐅᑦᓱᑎᒃ.
ᑖᒃᑯᐊ ᕿᓂᔭᕈᑏ ᐱᕕᖃᕐᑎᓯᓚᐅᔪᔪᑦ ᑎᒍᔨᓐᓂᒍᑎᖃᕐᓂᒥᒃ ᒪᑯᓂᖓ:
- 15 ᑯᕌᒻ ᑰᑫᓐ
- 2 ᑎᒍᒥᐊᒑᒃ ᐅᖃᓕᒪᐅᑏᒃ
- 2 ᐃᑯᒪᐅᒻᒨᑑᒃ ᐊᓪᓚᒍᑎᐊᐲᒃ
- $360 ᑳᓇᑕᒥᐅᑦ ᑖᓚᖏᑦ
- ᐊᑦᔨᒌᖕᖏᑐᑦ ᐱᐅᓕᓐᓂᐊᒉᑦ ᐊᑐᕐᑕᐅᔪᑦ ᐋᖓᔮᓐᓇᑐᑦ ᓂᐅᕐᕈᑕᐅᓂᖓᓄᑦ
- ᓄᓇᒃᑰᔫᖅ Liberty Jeep