ᐃᓄᓕᒫᓂᒃ ᐅᖃᐅᑦᔨᓂᒍᑏᑦ ᐱᔪᑦ ᐃᓄᑦᔪᐊᑉ ᓄᓇᓕᖓᑕ ᑲᕙᒫᐱᖓᓂ – ᓯᕗᓕᕐᑎ

ᐃᓄᑦᔪᐊᖅ, ᑯᐯᒃ – ᔪᓓ 22, 2025 – ᑕᕐᕋᒥ ᓄᓇᓕᒃ ᐃᓄᑦᔪᐊᒥ ᓂᓪᓕᕈᑎᖃᕈᒪᕗᑦ ᐱᕐᔪᐊᑐᒥᒃ ᐃᓱᒫᓗᓐᓇᓱᓂᓘᕐᑐᒥᒃ ᐱᔭᑦᓴᕈᕐᖃᒥᐅᓚᐅᕐᑐᒥᒃ ᓱᕐᕃᓂᖃᒻᒪᕆᑦᓱᓂ ᓄᓇᓕᑦᑎᓂᒃ ᐱᑦᔪᔭᐅᒍᑎᐅᓪᓚᕆᒋᐊᓕᓐᓂᓗ ᐱᑦᔪᔨᒍᑎᐅᕙᑦᑐᓂᒃ ᓄᓇᕕᒻᒥ ᐳᓕᓰᑦ ᐱᑦᔪᔨᓂᖏᑎᒍᑦ.

ᐅᓪᓗᓂ ᐊᒥᓲᓕᕐᑐᓂ, ᓄᓇᕕᒻᒥ ᐳᓕᓰᑦ ᐱᑦᔪᔨᔨᖏᑦ ᐅᖄᓚᖕᖑᐊᕕᐅᖃᑦᑕᒪᑐ ᐊᒥᓱᑲᓪᓚᓄᑦ ᑐᓴᕐᑎᑕᐅᒍᑎᖃᖃᑦᑕᓱᑎᒃ ᖁᑭᐅᑎᓂᒃ ᐃᕐᓯᓇᕿᐅᑎᓕᓐᓄᑦ, ᐃᓚᖃᕐᓱᑎᒃ ᖁᑭᕐᓂᓂᐊᕐᓂᕋᑐᓂᒃ ᓄᓇᕐᖃᑎᒥᓂᒃ ᑕᒫᓂ ᓄᓇᓕᑦᑎᓂ. ᑖᒃᑯᐊ ᐅᖄᓚᖕᖑᐊᓂᐅᖃᑦᑕᑐᑦ ᐃᓱᒫᓗᓐᓇᑐᑐᐃᓐᓇᐅᖏᑦᑐᑦ ᐃᓱᒫᓗᓐᓇᕆᐊᓪᓚᒍᑎᖃᕋᒥ ᐃᓄᓕᒫᑦ ᑲᑉᐱᐊᓇᕐᑐᒦᑦᑌᓕᒋᐊᖃᕐᓂᖏᓐᓂᒃ ᐅᐃᒪᓇᕐᑐᓕᕆᓂᕐᒥᓗ ᐱᑦᔪᔨᒍᑎᓂᒃ ᐊᕝᕕᐊᒪᕆᒻᒥᓱᑎᒃ.

ᐳᕿᐊᓇᖕᖏᓚᕆᓪᓗᑕ ᑐᑭᓯᔭᐅᑦᓯᐊᕈᒪᔪᒍ; ᑕᒪᒃᑯᐊ ᐅᖄᓚᖕᖑᐊᓂᐅᖃᑦᑕᑐᑦ ᑕᒐᑕᒐ ᓄᕐᖃᑕᐅᒋᐊᖃᓪᓚᕆᓕᕐᑐᑦ. ᑌᒫᒃ ᐅᖄᓚᑲᑕᖕᖑᐊᓂᖅ ᐋᓐᓂᓇᕐᑐᒐᑎᒃ ᐸᕝᕕᓵᕆᓂᐅᖕᖏᑐᑦ, ᐊᑐᕐᓂᓗᒻᒪᕆᓐᓂᐅᒐᒥᒃ ᐅᐃᒪᓇᕐᑐᓯᐅᕐᑐᑦ ᐊᑐᕆᐊᖃᓲᖏᓐᓂᒃ, ᐳᓖᓯᓂᒃ ᓴᖑᒪᑎᑦᓯᖃᑦᑕᓱᑎᒃ ᐅᐃᒪᓇᕐᑐᓯᐅᓪᓚᕆᓕᕐᑐᓂᒃ ᑲᒪᒋᔭᐅᖕᖏᑑᑎᑦᓯᒍᓐᓇᓱᑎᒃᐊᓪᓛᑦ ᐃᓅᒍᓐᓀᑐᖃᕐᓂᐅᔭᓕᕐᑎᓗᖑ. ᑌᒪᓕ ᐳᓕᓰᑦ ᐱᓂᕐᓗᐊᕿᓂᖃᓚᐅᕐᑎᓗᒋᑦ ᔫᓓ 17-ᒥ, ᐳᓖᓯᖁᑎᕗᑦ ᐱᑦᔪᔨᓂᖏᑦ, ᑐᑭᓯᓇᑦᓯᐊᑐᑦ, ᐃᑉᐱᒍᓱᓐᓂᓴᐅᒐᓱᒻᒪᕆᓕᕆᐊᖏᑦ ᑭᐅᑦᓯᐊᖃᑦᑕᓱᑎᒃᓗ ᐅᖄᓚᐅᑎᒥᒃ ᑌᒣᑦᑐᒐᓗᐊᓂᒃ ᐱᖕᖑᐊᖏᓪᓚᕆᑦᓱᑎᒃ ᑭᐅᑦᓴᐅᑎᒋᓂᕐᓴᐅᖃᑦᑕᓕᕐᓱᑎᒃᓗ. ᑕᒪᒃᑯᐊ ᑐᑭᓖᑦ ᐅᖄᓚᖕᖑᐊᑐᑦ ᖁᐊᕐᓵᖓᓇᕐᓰᓕᐅᒥᖃᑦᑕᕆᐊᖏᒃᑦ ᑕᒪᖏᓐᓂᓗ ᐳᓖᓯᓂᒃᓗ ᐃᓄᓐᓂᓗ ᓄᓇᕐᖃᑎᒌᓂᒃ ᑲᑉᐱᐊᓇᕐᑐᒨᕆᑐᐃᓐᓇᕆᐊᖃᕐᓱᑎᒃ.

ᓱᕐᖁᐃᑐᒥᒃ ᑕᒻᒪᖏᓪᓗᑎᒃ ᐊᕗᖓᐅᓕᒋᐊᕐᑐᓂᒃᓗ ᑐᓴᕐᑕᐅᑎᑦᓯᒍᑎᓂᒃ ᐊᑑᑎᔭᐅᖁᔨᑦᓱᖓ, ᐊᑕᓐᓂᐅᕈᑎᖃᕐᓯᒪᓕᕐᖁᖓ ᑲᒪᔨᐅᓚᖓᔪᒥᒃ ᐳᓖᓯᒥᒃ ᓄᓇᓕᑦᑕ ᓄᓇᕕᒻᒥ ᐳᓕᓰᑦ ᐱᑦᔪᔨᕕᖓᓂ ᐅᖄᓚᕕᐅᔪᕐᓗ 911 ᐱᑕᖃᕐᑎᓯᒍᑎᖃᖁᑦᓱᒍ ᐃᓗᐃᑦᑐᓯᐊᓂᒃ ᐊᓪᓚᓯᒪᔪᓂᒃ ᓂᐱᓕᐅᕐᓯᒪᔪᓂᒃᓗ ᑲᑉᐱᐊᓵᕆᑦᓱᑎᒃ ᐅᖄᓚᔪᓕᒫᓂᒃ ᑌᒣᑕᐅᖁᔨᑦᓱᖓ. ᑐᓂᓯᒪᓂᖃᑦᓯᐊᕋᑦᑕ ᑲᒪᓇᓱᖃᑦᑕᓚᖓᑦᓱᑕ ᐃᓘᓐᓇᖏᓐᓂᒃ ᖃᓄᐃᓘᓗᑲᒍᑎᐅᔪᓂ ᑭᖑᓂᐊᒍᑦ ᐊᐅᓚᑦᓯᒋᐊᕐᓂᖃᖃᑦᑕᓂᐊᓕᕐᓱᑕ.

ᐱᓂᕐᓗᓂᕐᒨᑌᓕᒋᐊᖃᕐᓂᖏᓪᓗ ᖃᓄᐃᖕᖏᓯᐊᕆᐊᖃᕐᓂᖏᓪᓗ ᐃᓄᑦᔪᐊᒥᐅᑦ ᐊᖏᔪᕐᔪᐊᒥᒃ ᐱᖕᖑᐊᖑᖕᖏᒪᑕ. ᓇᓪᓕᑐᐃᓐᓇᖓ ᐃᓄᐃᑦ ᑕᒪᒃᑯᓂᖓ ᓱᓕᖕᖏᑐᓂᒃ ᑐᓴᕐᑕᐅᑎᑦᓯᖃᑦᑕᑐᑦ ᓱᒋᐊᕐᑕᐅᓂᖃᒻᒪᕆᓐᓂᐊᖁᑦ ᐱᖁᔭᑎᒍᑦ ᐊᐅᓚᑦᓯᒍᑏᑦ ᐊᑐᕐᑕᐅᑎᓪᓗᒋᑦ. ᑌᒣᓗᓗᑲᒍᑎᖃᖃᑦᑕᑐᓂᒃ ᐊᑕᓐᓂᐅᕕᖃᕐᐳᒍᑦ ᐃᓱᒪᒋᐊᑦᓯᐊᖁᔨᑦᓱᑕ ᐊᖏᔪᒥᒃ ᓱᕐᕃᓂᖃᖃᑦᑕᕆᐊᖏᑦ ᐱᓂᐊᕐᓂᖏᑦ, ᐱᓂᕐᓗᑫᓚᕿᒍᓐᓇᓱᑎᓪᓘᒪᑕ ᐋᓐᓂᕈᑎᐅᓚᕿᓗᑎᒃᓗᓃᑦ , ᐱᓂᕐᓗᔪᐊᕈᑎᐅᓗᑎᓪᓗᓃᑦ, ᑐᖁᒍᑎᐅᓚᕿᓗᑎᓪᓗᓃᑦ ᐱᔭᐅᔪᓂᒃ ᓴᖑᑎᑕᐅᒪᓂᖏᓐᓄᑦ ᐱᑦᔪᔨᒍᑏᓪᓗᓃᑦ ᐊᕐᓱᕈᕐᓂᓴᒥᓪᓗᓃᑦ ᑲᒪᒋᔭᐅᔪᖃᓯᓂᒃᑯᑦ.

ᐊᑕᕐᖑᓯᕐᕕᖃᕐᐳᒍᑦ ᐃᓄᑦᔪᐊᒥᐅᓂᒃ ᑲᒪᑦᓯᐊᖏᓐᓇᖁᕐᓱᒋᑦ, ᐃᑲᔪᕐᓯᒪᑦᓯᐊᖏᓐᓇᖁᑦᓱᒍᒋᓗ ᐊᖓᔪᕐᖃᐅᑎᓂᒃ, ᑐᑭᓯᒪᑦᓯᐊᓂᖃᕐᓗᑎᒃᓗ ᐱᒻᒪᕆᓪᓗᑐᐊᓘᒋᐊᖏᑦ ᐅᐃᒪᓇᕐᑐᓯᐅᕐᓂᓂᒃ ᐱᑦᔪᔨᒍᑏᑦ ᐊᑐᕐᑕᐅᓯᐊᕆᐊᖃᕐᓂᖏᑦ. ᑐᓴᕐᑕᐅᑎᑦᓯᒍᑎᑦᓴᖃᕈᑦᓯ ᑖᒃᑯᐊ ᐅᖄᓚᖕᖑᐊᓂᐅᖃᑦᑕᑐᑦ ᐱᓪᓗᒋᑦ, ᖃᐅᔨᑎᑦᓯᑲᐱᒋᐊᖃᕐᐳᓯ ᓄᓇᕕᒻᒥ ᐳᓕᓰᑦ ᐱᑦᔪᔨᔨᖏᓐᓂᒃ.

ᐊᑏ ᐱᓇᓱᖃᑎᒌᓚᐅᕐᑕ ᓯᕗᓂᑦᓴᕗᑦ ᐱᐅᓂᕐᓴᐅᖁᓗᒍ ᓱᕐᖁᐃᑐᒥᓗ ᐃᓄᑦᔪᐊᑉ ᓄᓇᓕᖓ ᑲᑉᐱᐊᓇᕐᑐᑕᖃᖁᓇᒍ ᐃᓱᒫᓗᓐᓇᖏᑦᑐᓗᓂᓗ ᐃᓘᓐᓀᓄᑦ ᐃᓄᑦᔪᐊᒥᐅᓄᑦ ᐃᓄᑦᔪᐊᒦᑦᑐᓄᓪᓗ.

ᐹᐱ ᐃᐳ
ᐃᓄᑦᔪᐊᒥᐅᑦ ᓯᕗᓕᕐᑎᖓᑦ