ᐃᕐᖃᐅᒪᒐᑦᓴᓂᒃ ᓇᓗᓀᒃᑯᓯᕐᑕᐅᒍᑏᑦ ᓯᕗᓕᕐᑎᐅᖃᑦᑕᓯᒪᓕᕐᓱᑎᒃ ᖁᕕᐊᓲᑕᐅᔪᓂᒃ ᑲᓇᑕᓕᒫᒥ ᐳᓖᓰᑦ ᐊᖓᔪᕐᖃᐅᑎᓗᑳᖏᑦ ᑲᑎᖃᑎᒌᓐᓂᖃᕐᑎᓗᒋᑦ
ᔫᓂ 12-ᒥᑦ 14-ᒧᑦ, ᐊᖓᔪᕐᖄᒪᕆᖓ ᐳᓖᓰᑦ ᔮᓐ-ᐱᐊᕐ ᓚᕈᔅ O.O.M., ᐃᓚᖃᕐᓱ ᐱᓇᓱᖃᑎᒋᓲᒥᓂᒃ, ᓵᓐ ᓛᖕᓯᑐᔨᑦ ᐊᒻᒪᓗ ᐸᑦᕆᔅ ᐊᐱᓪ, ᐁᓯᒪᖃᑕᐅᒋᐊᕐᑐᓯᒪᓚᐅᕐᖁᑦ ᑯᐯᒻᒥ ᓄᓇᖃᕐᖄᓯᒪᔪᑦ ᐃᓄᐃᓪᓗ ᐊᖓᔪᕐᖃᐅᑎᖏᑦᑕ ᑲᑐᑦᔨᖃᑎᒌᓐᓂᖓᑕ ᑲᑎᒪᓂᒻᒪᕆᖓᓄᑦ ᑯᐯᒃ ᓯᑎᒥ.
ᑕᒪᓐᓇ ᐊᑑᑎᓚᐅᕐᑐᖅ ᑲᑎᖃᑎᒌᑦᑎᓯᓂᐅᓚᐅᕐᖁᖅ ᐳᓖᓰᑦ ᐊᖓᔪᕐᖃᐅᑎᖏᓐᓂᒃ ᑭᒡᒐᑐᕐᑎᓂᓗ ᑯᐯᓕᒫᒥᐅᓂᒃ ᑲᓇᑕᓕᒫᒥᐅᓂᓪᓗ ᐅᓂᒃᑳᓯᐅᖃᑦᑕᐅᑎᒋᐊᕐᑐᑐᓂᒃ ᖃᓄᐃᓕᐅᕐᓱᑎᓪᓕ ᐊᑲᐅᓂᕐᐹᑯᑦ ᐱᓂᐊᕐᓂᖃᓲᖑᒻᒪᖔᑕ ᐳᓖᓯᐅᖃᑎᖏᑦ, ᐱᑐᑦᓯᒪᐅᑎᖃᑎᒌᓐᓂᕆᒋᐊᓕᒻᒥᓂᓪᓗ ᑲᔪᖏᕐᓭᖃᑎᒌᑦᓱᑎᒃ, ᖁᕕᐊᓲᑎᖃᕐᓱᑎᓪᓗ ᐱᑦᓯᐊᕈᓐᓇᕕᓕᒫᑎᒍᑦ ᐱᓇᓱᐊᕆᐊᖃᕐᓂᒥᓂᑎᒍᑦ ᑭᒡᒐᑐᓕᕈᑎᒃ ᓄᓇᖃᕐᖄᓯᒪᔪᓂᒃ ᐊᒻᒪᓗ ᑕᕐᕋᒥᐅᓄᑦ ᐳᓖᓯᒋᔭᐅᒋᐊᕐᑐᓯᒪᓕᕈᑎᒃ.
ᐃᕐᖃᐅᒪᒐᑦᓴᑖᕐᕕᒋᓚᐅᕐᑕᖓ ᑕᒪᓐᓇ ᑲᑎᓐᓂᕆᓚᐅᕐᑕᖓ ᐃᓕᑕᕐᓯᒍᑕᐅᑦᓱᓂᓗ ᐱᖓᓱᓗᐊᖕᖑᐊᓂᒃ ᑐᓂᒪᖃᑦᑕᓯᒪᓕᕐᑐᓂᒃ ᑕᒪᑐᒧᖓ ᐱᓇᓱᒐᑦᓴᔭᒥᓄᑦ ᐋᑐᕚᕐᒥᐅᓴᔭᐅᑦᓱᑎᒃ ᐳᓖᓯᓂᒃ, ᓵᓐ ᓛᖕᓯᑐᔩᑦ, ᐸᓪ ᑐᕐᓕ, ᕗᕌᓐᔅ ᓯᐊᓴᓐ, ᐊᑐᓂᑦ ᐅᐱᒋᔭᐅᒍᑎᑖᕐᑎᑕᐅᓚᐅᕐᑐᑦ ᐱᓇᓱᐊᕐᓯᒪᓕᕐᓂᒥᓄᑦ ᐊᕐᕌᒍᓂ 15-ᓂᑦ ᐱᓇᓱᐊᑦᓯᐊᓯᑎᐹᓘᓯᒪᑦᓱᑎᓗ ᑭᒡᒐᑑᑎᒥᓂᒃ.
ᐊᒻᒪᓗᒋᐊᓪᓚᒃ, ᐊᖓᔪᕐᖄᒪᕆ ᓚᕈᔅ ᐃᓕᑕᕆᔭᐅᒍᑎᑖᓚᐅᕐᒥᔪᖅ ᐳᓖᓯᓂᑦ ᐊᖓᔪᕐᖃᐅᖃᑎᒋᓲᒥᓂᑦ ᓂᕈᐊᕐᑕᐅᓂᕕᓂᕐᒥᓄᑦ ᑲᓇᑕᓕᒫᒥᐅᓂᑦ ᐱᔪᒥᒃ ᐃᑉᐱᓇᓪᓗᕆᑦᑐᐊᓗᓐᓂᒃ ᐃᑲᔪᕐᓯᒪᖃᑦᑕᓯᒪᓕᕐᒪᑦ ᐳᓖᓯᓕᕆᓂᕐᒥ, ᓯᕗᓕᕐᑎᐅᓂᕐᒥᓂᒃ ᑕᒪᒃᑯᓇᓂ ᐊᑐᕐᓱᓂ ᓴᑐᕐᑕᐅᓇᕐᑐᐊᓘᖃᑦᑕᓯᒪᓂᖓᓄᑦ, ᐊᒻᒪᓗ ᐱᔨᑦᓯᒍᓯᖓ ᐃᓕᑦᓯᓇᕐᑐᒪᕆᐊᓘᖃᑦᑕᓯᒪᒻᒪᑦ ᐆᑦᑑᑎᑦᓴᓯᐊᒻᒪᕆᐊᓘᑦᓱᓂ ᐱᓇᓱᖃᑎᒋᓲᒥᓂᒃ ᐃᓱᒻᒦᓯᐊᕐᓯᑎᐊᓘᑦᓱᓂ ᐊᒻᒪᓗ ᓯᕗᓂᕐᒥ ᑭᖑᕚᑦᓴᑕ ᐳᓖᓯᐅᒍᒫᕐᒥᔪᓄᑦ ᐃᕐᖃᐅᒪᒐᑦᓴᓯᐊᓂᒃ ᕿᒻᒪᕇᒍᓇᐅᓕᕐᒪᑦ ᐳᓖᓯᓂ ᓯᕗᓕᕐᑎᐅᒍᒫᓕᕐᒥᔪᓄᑦ.
