ᓄᐃᑕᐅᓂᖓ ᓄᓇᕕᒻᒥ ᓇᐅᓕᒫᓂᒃ ᐊᑦᑕᓇᕐᑐᒦᑦᑎᓯᑦᑌᓕᓂᕐᒧᑦ / ᑲᑎᖕᖓᔩᑦᑐᕌᖓᔪᖅ ᐃᓄᑐᐃᓐᓀᑦ ᓄᓇᓕᖏᓐᓂ ᑲᒪᒋᔭᖃᑦᓴᐅᑎᒋᒍᓐᓇᑐᓂᒃ ᐱᑦᓯᐊᓗᑎᒃ ᐳᓕᓯᖃᕐᓂᒧᑦ

ᓅᕕᒻᐱᕆ 20, 2024-ᒥ, ᒪᑭᕝᕕᒃ ᐊᒻᒪᓗ ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᑲᑎᓯᓚᐅᔪᕘᒃ ᓄᓇᓖᑦ ᓯᕗᓕᕐᑎᖏᓐᓂᒃ ᑲᑎᖕᖓᐅᑎᖃᕐᓱᑎᒃ ᒫᓐᓇ ᐳᓖᓯᖃᕐᓂᐅᑉ ᖃᓄᐃᓕᖓᔪᒦᓐᓂᕆᔭᖓᓂᒃ ᓄᓇᕕᒻᒥ. ᑖᓐᓇ ᑲᑎᖕᖓᓂᖅ ᐊᑑᑎᓚᕿᑎᑕᐅᓚᐅᔪᖅ ᐱᓂᕐᓗᒪᕆᓐᓂᐅᓚᐅᔪᒧᑦ ᓴᓪᓗᓂ, ᑖᑦᓱᒪ ᑕᕐᕿᐅᑉ ᐱᒋᐊᕐᓂᖓᓂ.

ᑐᕌᒐᕆᓚᐅᔭᖓ ᑖᑦᓱᒪ ᑲᑎᖕᖓᓂᐅᑉ ᒪᕐᕈᐃᓕᕿᖓᓚᐅᔪᖅ. ᓯᕗᓪᓕᖅ, ᐱᒻᒪᕆᐅᓚᐅᔪᖅ ᓇᓗᓀᕐᓯᒋᐊᒥᒃ ᖃᓄᐃᓘᕈᓐᓇᒪᖔᑦᑕ, ᑲᑐᑦᔨᓗᑕ, ᐱᐅᓯᒋᐊᕋᓱᓪᓗᒍ ᐱᓇᓱᐊᖃᑎᒌᓐᓂᖓ ᐳᓖᓰᑦ ᐊᒻᒪᓗ ᐅᓄᑐᐃᓐᓀᑦ ᓄᓇᓕᖏᑦ. ᑐᖓᓕᖓ, ᓄᓇᓖᑦ ᓯᕗᓕᕐᑎᖏᑦ, ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᐊᒻᒪᓗ ᒪᑭᕝᕕᒃ ᐃᓘᓐᓇᑎᒃ ᐊᖏᖃᑎᒌᓚᐅᔪᑦ ᑖᓐᓇ ᐱᒻᒪᕆᐊᓘᒋᐊᖓ ᐃᓱᒪᑦᓴᓯᐅᕈᑎᐅᒋᐊᖃᕐᓱᓂ.

ᐋᕐᕿᓚᕆᒐᓱᓪᓗᒍ ᑖᓐᓇ ᑲᑎᖕᖓᐅᑎᐅᔪᖅ, ᒪᑭᕝᕕᒃ ᐊᒻᒪᓗ ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᐊᖏᖃᑎᒌᑦᓯᒪᕘᒃ ᓄᐃᑦᓯᓂᕐᒥᒃ ᓄᑖᓂᒃ ᓄᓇᕕᒻᒥ ᓇᐅᓕᒫᓂᒃ ᐊᑦᑕᓇᕐᑐᒦᑦᑎᓯᑦᑌᓕᓂᕐᒧᑦ ᑲᑎᖕᖓᔨᓂᒃ. ᑖᒃᑯᐊ ᑲᑎᖕᖓᔩᑦ ᑐᕌᒐᓖᑦ ᐃᒣᒋᐊᖁᔨᒍᑎᓕᐅᕐᓂᒥᒃ ᐱᐅᓯᒋᐊᕆᒍᑎᑦᓴᓂᒃ ᖃᓄᖅ ᐱᒍᑦᔨᓃᑦ ᐱᓇᓱᐊᕐᑕᐅᓲᖑᒻᒪᖔᑕ ᓄᓇᕕᒻᒥ ᐳᓖᓯᓄᑦ (NPS). ᑕᒪᓐᓇ ᐅᑉᐱᕆᐅᑎᓕᕆᐊᓪᓚᓂᕐᒥᒃ ᓄᐃᑦᓯᓚᖓᔪᖅ ᐊᑯᓐᓂᖓᓂ ᐳᓖᓰᑦ ᐊᒻᒪᓗ ᓄᓇᓖᑦ.

ᓄᓇᕕᒻᒥ ᓇᐅᓕᒫᓂᒃ ᐊᑦᑕᓇᕐᑐᒦᑦᑎᓯᑦᑌᓕᓂᕐᒧᑦ ᑲᑎᖕᖓᔩᑦ ᑲᑎᑎᑦᓯᓚᖓᔪᑦ ᐱᓇᓱᐊᖃᑕᐅᓗᐊᖕᖑᐊᑐᓂᒃ ᖃᐅᔨᓴᕐᓗᑎᒃ ᖃᓄᐃᓕᖓᓂᕆᓯᒪᔭᖏᓐᓂᒃ ᐳᓖᓯᖃᕐᓂᐅᑉ ᓄᓇᕕᒻᒥ, ᑲᔪᓯᑎᑦᓯᓗᑎᒃ ᐱᕙᓪᓕᐊᑎᑦᓯᖃᑎᒌᓐᓂᒥᒃ ᐱᓇᓱᐊᖃᑎᖃᕐᓂᒧᑦ ᖃᓄᕐᑑᕈᑎᓂᒃ, ᐊᔭᐅᕆᒋᐊᕐᓗᓂ ᑐᑭᓯᒪᑎᑦᓯᒐᓱᐊᕐᓂᒥᒃ, ᐊᒻᒪᓗ ᓇᕝᕚᓗᑎᒃ ᐋᕐᕿᕈᑎᑦᓴᓂᒃ ᐊᑦᔨᐅᖏᑦᑐᒧᑦ ᐃᓅᖃᑎᒌᓐᓂᑯᑦ ᐃᓗᕐᖁᓯᒨᓕᖓᔪᓂᒃ, ᐱᖁᔭᑎᒍᑦ ᐊᒻᒪᓗ ᓄᓇᐅᑉ ᖃᓄᐃᓕᖓᓂᖓᓄᑦ ᓄᓇᕕᒻᒥ.

ᓄᓇᓖᑦ ᓯᕗᓕᕐᑎᖏᑦ, ᐊᒻᒪᓗ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ ᓯᕗᓕᕐᑎᖏᑦ ᑐᑭᓯᒪᔪᑦ ᐃᓱᒪᑦᓴᓯᐅᕈᑎᑕᖃᓪᓚᕆᒋᐊᖃᕆᐊᖓ ᖃᓄᐃᓕᖓᓂᖓᓂᒃ ᓄᓇᕕᐅᑉ.

ᖃᓄᐃᓕᖓᓂᖏᑦ ᓄᓇᕕᒻᒥ ᓇᐅᓕᒫᓂᒃ ᐊᑦᑕᓇᕐᑐᒦᑦᑎᓯᑦᑌᓕᓂᕐᒧᑦ ᑲᑎᖕᖓᔩᑦ ᑐᑭᓯᓇᕐᑎᑕᐅᓛᕐᑐᑦ ᑲᑎᖕᖓᓂᖏᓐᓂ ᐳᕐᑐᓂᕐᓭᑦ ᑲᑎᖕᖓᔨᖏᑦᑕ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ ᐊᒻᒪᓗ ᒪᑭᕝᕕᐅᑉ ᐊᑑᑎᓛᕐᑐᒥ ᑏᓯᒻᐱᕆ 2024-ᒥ.

ᓇᐅᓕᒫᓂᒃ ᐊᑦᑕᓇᕐᑐᒦᑦᑎᓯᑦᑌᓕᓂᖅ ᐱᑕᖃᓪᓚᕆᒋᐊᓕᒃ, ᐊᒻᒪᓗ ᐊᑦᔨᒌᑦᑎᑕᐅᒋᐊᖃᕐᓱᓂ ᐃᑉᐱᓂᐊᓂᕐᒧᑦ ᐊᑦᑕᓇᕐᑐᒦᖕᖏᓂᕐᒥᒃ ᐃᓄᓕᒫᓂ. ᑎᒥᐅᔪᓕᒫᑦ, ᐃᓚᐅᑎᓪᓗᒋᑦ ᓄᓇᕕᒻᒥ ᐳᓖᓰᑦ, ᑐᓂᒪᔪᑦ ᑕᒪᑦᓱᒧᖓ. ᑲᑐᑦᔨᓗᑕ, ᐋᕐᕿᒍᑎᑦᓴᓂᒃ ᓇᕝᕚᓚᖓᕗᒍᑦ.

ᐃᓗᓕᒋᐊᓪᓚᖏᑦ ᑲᑎᖕᖓᔩᑦ ᐊᓪᓚᓯᒪᔪᑎᒍᑦ ᓄᐃᑕᐅᓛᕐᑐᑦ ᐅᓪᓗᓂ ᙯᔪᓂ.