ᓄᓇᕕᒻᒥ ᐳᓖᓰᑦ ᐊᖓᔪᕐᖄᖓᑕ ᐳᓚᕋᕐᓂᖓ ᓄᓇᓕᓐᓄᑦ ᓄᓇᕕᒻᒥ
ᐅᑭᐅᖅ ᐱᒋᐊᕐᓯᒪᓕᕐᑎᓗᒍ, ᐊᒥᓱᒐᓚᓐᓂᒃ ᐱᓇᓱᐊᕈᓯᕐᓂᒃ ᐳᓚᕋᓚᐅᔪᕗᖓ ᓄᓇᓖᑦ ᓯᕗᓕᕐᑎᖏᓐᓂᒃ ᐊᒻᒪᓗ ᓄᓇᓕᒻᒥᐅᓂᒃ ᐃᓘᓐᓇᖏᓐᓄᑦ 14-ᓄᑦ ᓄᓇᕕᒻᒥ ᓄᓇᓕᓐᓄᑦ. ᒫᑭ ᐳᑐᓕᒻᒧᑦ ᒪᓕᑦᑕᐅᓗᑯᓚᐅᔪᔪᕗᖓ, ᑐᑭᒧᐊᑦᑎᓯᔨᒻᒪᕆᐅᑉ ᐃᑲᔪᕐᑎᖓᓄᑦ, ᐳᓚᕋᕐᓂᑲᓂ ᐊᒥᓱᒐᓚᓐᓄᑦ ᓄᓇᓕᓐᓄᑦ.
ᑐᕌᒐᖓ ᑖᑦᓱᒪ ᐊᕐᕕᑕᕐᓂᐅᑉ ᑲᑎᓯᓂᐅᒋᐊᕐᑐᓚᐅᔪᕗᖅ ᓄᓇᓖᑦ ᓯᕗᓕᕐᑎᖏᓐᓂᒃ, ᓄᓇᓕᐅᑉ ᑲᑎᖕᖓᔨᖏᓐᓂᒃ ᐊᒻᒪᓗ ᐊᓯᖏᓐᓂᒃ ᓄᓇᓕᒻᒥ ᓯᕗᓕᕐᑎᓂᒃ, ᐊᒻᒪᓗ ᐃᓚᐅᒋᐊᕐᑐᓱᖓ ᑭᓇᒃᑯᑐᐃᓐᓇᐃᑦ ᐅᖄᖃᑎᒌᓐᓂᖏᓐᓄᑦ ᐳᓖᓯᓕᕆᓂᐅᑉ ᒥᑦᓵᓄᑦ ᐊᒻᒪᓗ ᑭᓇᒃᑯᑐᐃᓐᓇᐃᑦ ᐊᑦᑕᓇᕐᑐᒦᑎᑕᐅᑦᑕᐃᓕᓂᖏᑦᑕ ᐊᑦᓱᕈᕐᓇᓂᖏᓐᓄᑦ ᐃᓘᓐᓇᑕ ᓵᖕᖓᓲᕗᑦᑕ ᒥᑦᓵᓄᑦ. ᐱᕕᑦᓴᓕᐅᓚᐅᔪᒻᒥᔪᒍ ᑲᑎᓯᓂᕐᒥᒃ ᐳᓖᓯᓂᒃ, ᖃᐅᔨᓴᕐᓱᑕᓗ ᐳᓖᓰᑦ ᐊᓪᓚᕕᖏᓐᓂᒃ ᐊᒻᒪᓗ ᐱᓇᓱᑦᑏᑦ ᐃᓪᓗᖏᓐᓂᒃ, ᖃᐅᔨᓴᕐᒥᓱᑕᓗ ᐃᖏᕐᕋᐅᑎᖏᓐᓂᒃ, ᐊᒻᒪᓗ ᐃᓘᓐᓈᒍᑦ ᐱᓇᓱᕝᕕᐅᑉ ᖃᓄᐃᓕᖓᓂᖏᓐᓂᒃ.
ᐊᑐᓂ ᐳᓚᕋᕐᓂᖅ ᐱᔭᕇᕐᓂᖃᖃᑦᑕᓚᐅᔪᔪᖅ ᑐᓴᐅᑎᒦᓐᓂᒥᒃ ᓄᓇᓕᒻᒥ ᓄᓇᓕᓐᓄᑦ ᓇᐃᑦᑐᒥᒃ ᐅᖄᖃᑎᖃᖃᑦᑕᓱᑕ ᓂᕈᐊᕐᑕᐅᒪᔪᓂᒃ ᑭᒡᒐᑐᕐᑎᓂᒃ ᐃᓚᖃᕐᓱᑕ. ᐅᖄᓚᐅᑎᒥᒃ ᐊᑐᐃᓐᓇᐅᑎᑦᓯᖃᑦᑕᓚᐅᔪᒻᒥᔪᒍᑦ ᑐᕋᐃᓐᓇᑐᒥᒃ ᑭᓇᒃᑯᑐᐃᓐᓇᐃᑦ ᐊᐱᕐᓲᑎᖏᓐᓂᒃ ᑭᐅᒍᑎᒋᖃᑦᑕᓱᒍ ᐊᒻᒪᓗ ᑐᓵᒍᑎᒋᑦᓱᒍ ᐃᓄᑑᓈᕐᑎᑐᑦ ᐃᓱᒫᓘᑎᖏᓐᓂᒃ.
ᓱᓕᑦᓯᐊᑐᒥᒃ ᓇᑯᕐᒦᖁᒍᑦ ᐃᓄᐃᒃᑯᓂᒃ(#AirInuit) ᐱᐅᔪᒻᒪᕆᒻᒥᒃ ᐊᕐᕕᑕᖃᑎᐅᓂᕆᓚᐅᔪᔭᖏᓐᓄᑦ. ᖃᖓᑕᖃᑦᑕᓱᑎᒃ ᓯᓚᐅᑦᓯᐊᖏᑦᑐᓚᕆᒃᑯᑦ ᐊᒻᒪᓗ ᐱᔭᕆᐊᑐᔪᒃᑯᑦ ᐋᕐᕕᑕᕐᓂᒥᒃ ᐋᕐᕿᓱᐃᓂᕆᖃᑦᑕᓚᐅᔪᔪᔭᖏᑦ ᐱᔭᕆᐊᑭᑦᑐᐅᐱᐅᑎᓐᓇᒋᑦ, ᐊᒻᒪᓗ ᐊᕐᕕᑕᕐᓂᖅ ᐊᑑᑎᕐᖃᔭᓚᖓᓚᐅᔪᖕᖏᑐᖅ ᑐᓂᒪᓚᐅᔪᖕᖏᐸᑕ ᐊᒻᒪᓗ ᐃᑲᔪᕐᓯᒪᓚᐅᔪᖕᖏᐸᑕ ᑖᒃᑯᐊ.
- ᔭ-ᕙᕌᓱᐊ ᐱᐊᕐᓂᐃ, ᐳᓖᓰᑦ ᐊᖓᔪᕐᖄᖓ
