ᓄᓇᕕᐅᑉ ᐳᓖᓯᖏᑦ ᐊᑕᐅᓯᐅᖃᑎᖃᕐᓂᕋᕐᐳᑦ ᓴᐳᑦᔨᓯᒪᓂᕋᕐᓱᑎᓪᓗ ᒪᓐᑐᕆᐊᑉ ᐳᓖᓯᖏᓐᓂᒃ
ᓄᓇᕕᐅᑉ ᐳᓖᓯᖏᑦ (NPS) ᐊᓕᐊᓇᖕᖏᑐᕐᔪᐊᑰᕐᓂᒥᓂᒃ ᐊᑕᐅᓯᐅᖃᑎᖃᕐᓂᒥᓂᓪᓗ ᐅᖃᐅᓯᖃᕐᕕᖃᕐᐳᑦ ᒪᓐᑐᕆᐊᑉ ᐳᓖᓯᖏᓐᓂᒃ (SPVM), ᐃᑉᐸᓴᖅ ᐃᓚᒋᓲᒥᓄᑦ ᕿᒪᑦᑕᐅᓚᐅᕐᑎᓗᒋᑦ, ᐳᓖᓯᒧᑦ Mohamed Lamine Benredouane-ᒧᑦ, 34-ᓂᒃ ᐅᑭᐅᓕᒻᒧᑦ, ᐃᓅᒍᓐᓀᓚᐅᕐᑐᒧᑦ ᐱᓇᓱᐊᕐᓱᓂ. ᐃᓅᒍᓐᓀᑐᖃᓚᐅᕐᒥᔪᖅ ᐳᓖᓯᐅᖕᖏᑐᒥᒃ ᐸᓯᔭᐅᒪᔪᕐᓗ ᑐᖁᑕᐅᒻᒥᑎᓪᓗᒍ, ᐳᓖᓯᒋᐊᓪᓚᒃ ᖁᑭᕐᑕᐅᓚᐅᕐᒥᔪᖅ, ᐊᑦᑕᓇᖕᖏᑐᒦᓐᓂᕋᕐᑕᐅᔫᒐᓗᐊᖅ.
NPS-ᑯᑦ ᐱᓇᓱᐊᖃᑎᙯᓐᓇᓲᑦ SPVM-ᑯᓐᓂᒃ ᖃᐅᔨᓴᖃᑎᒋᕙᑦᓱᒋᑦ ᐱᖁᔭᑎᒍᑦ ᓯᖁᑦᑎᕆᓂᕐᓅᓕᖓᔪᓂᒃ ᓄᓇᕕᐅᑉ ᓄᓇᓕᖏᓐᓅᓕᖓᑐᐊᕐᒪᑕ. ᐳᓖᓯᐅᖃᑎᒌᑦ ᑕᒪᒋᓐᓂ ᑖᒃᑯᓇᓂ ᐳᓖᓯᐅᔪᓂᒃ ᖃᐅᔨᒪᐅᑎᑦᓯᐊᑐᑦ ᐱᓇᓱᐊᖃᑎᒌᖏᓐᓇᓕᒫᕐᐸᓱᑎᓪᓗ ᐱᓂᕐᓗᕋᕐᑎᐅᔪᖁᑕᐅᔪᑦ ᐱᓪᓗᒋᑦ.
“ᐊᖑᑏᑦ ᐊᕐᓀᓗ NPS-ᑯᓐᓂᒃ ᓂᑯᕐᕋᖃᑕᐅᕗᑦ ᐊᑕᐅᓯᐅᖃᑎᖃᕐᓱᑎᒃ SPVM-ᑯᓐᓂ ᐱᓇᓱᐊᖃᑎᒋᕙᑦᑕᑎᓐᓄᑦ ᐱᖃᑎᑦᑎᓄᓪᓗ ᐅᖁᒣᑦᑐᑰᕐᑎᓗᒋᑦ. ᐃᓚᑦᔪᒍᓱᓂᔪᐊᖃᕐᐳᒍᑦ ᐃᓱᒪᒋᑦᓱᒋᑦ ᐳᓖᓯ Benredouane ᐃᓚᒋᔭᖏᑦ. ᐃᓚᑦᔪᒋᔭᖃᕐᒥᓱᑕᑦᑕᐅᖅ ᐃᓚᒋᔭᖏᓐᓄᑦ ᒪᓐᑐᕆᐊᒦᐅᑉ ᑐᖁᑕᐅᓚᐅᕐᒥᔫᑉ ᖁᑭᐊᔪᖃᕐᑎᓗᒍ. ᑖᓐᓇ ᐊᓕᐊᓇᖕᖏᑐᕐᔪᐊᖅ ᐊᑑᑎᔪᖅ ᐃᕐᙯᒍᑎᒋᕙᕗᑦ ᐃᑐᒪᒋᔭᑦᓴᐅᔭᖕᖏᑐᒃᑯᑦ ᑲᕐᐱᐊᑌᑦᑑᓂᕆᕙᑦᑕᖓᓂᒃ ᑐᓂᒪᓂᕆᕙᑦᑕᖓᓂᓪᓗ ᐳᓖᓰ ᐊᓯᖏᓪᓗ ᓯᕗᓪᓕᐸᐅᑦᓱᑎᒃ ᑲᒪᔨᐅᒋᐊᖃᕐᐸᑐᐃᑦ, ᐊᑦᑕᓇᕐᑐᒦᑦᓭᓇᓲᖑᒻᒪᑕ ᖃᐅᑕᒫᑦ ᓄᓇᓕᕗᑦ ᐊᑦᑕᓀᑦᑐᒦᖁᓪᓗᒋᑦ.”
-Jean-François Bernier, ᔭᓐ-ᕗᕋᓐᓱᐊ ᐱᐊᕐᓃ, ᓄᓇᕕᐅᑉ ᐳᓖᓯᖏᑦᑕ ᐊᖓᔪᕐᖄᒐ
